GEMA JUMAT, 8 FEBRUARI 2019
Oleh : Nurjannah Usman
Gunong Geureudong meugah manyang that
Hana lom mupat Leuser di Aceh Tenggara
Jinoe loen peugah koen tameu upat
Haba peutupat beek rouh lam subra
Leu nyang karue wahee eu sahbat
Kadang peutupat haba lam media
Keunoe keudeh punca tan mupat
Asai meusapat ladom peeh meja
Leu nyang karu pesan teu intat
Kadang tan mupat duem lewat WA
Hana ta tusoe yang phoen pukat
Haba geu intat salah tan beuna
Nyang ladom latah watee geu intat
Hana cek sapat langsong geu WA
Keudeh ngoen keunoe rap mandum tempat
Hana nyang silap geu kirem sigra
Kadang berita jipeugoet seusat
Tanyoe nyang mupat bek kirem sigra
Hana tatu’oh cek galom keutat
Haba beek intat wahee syedara
Watee troek pesan neu baca leugat
Nyang hana meupat neu cek beu sigra
‘Oh lheuh kajelas dalam mufakat
Baroe hai sahbat neu rika-rika
Nyang ladom syara watee meusapat
Haba tan mupat geu rika-rika
Cukop that rugoe dosa rayeuk that
Nyan intat-intat berita riya
Wahee eu rakan wareh ngoen sahbat
Tanyoe beek ligat bak mita dosa
Haba beek leubeh wate meusapat
Di Malaikat geu catat sigra
Peugah nyang penteng nyang beek meu upat
Walau seunang that ngoen rakan duem na
Beek peugah haba dosa geu catat
Ingat hai sahbat peungaruh media
Media peunteng koen tempat meu upat
Nyan masyarakat beek sia-sia
Asai tatuleh tameu hikayat
Pasti na sahbat nyang kalheuh baca
Oleh karena nyan tuleh ban pakat
Nyang jeut keu ubat jeut keu peunawa
Tuleh nyang butoi beu jeut nasihat
Tanyoe pih sehat Allah bi Pahala
Malam pih supot buleun tan meupat
Ureueng jak pukat mangat keurija
Meu mada ‘oh no haba hikayat
Meu’ah hai sahbat salah ngoen beuna
Neuheun, 07 Februari 2019
