Beasiswa
Oleh : Ummi Kamil
Assalamualaikum awai ulon bri
Pujoe keu Rabbi keu Po yang Esa
Seulaweut saleum baginda nabi
Nyang paleng suci ateuh rueng donya
Lagak that bulee cicem merpati
Cicem keudidi babah si dupa
Haba lon singgong wahe eu ummi
Dana dum jibri nyan beasiswa
Keu bhah bantuan jinoe ta ungkie
Bhah mahasiswi seunang meubura
Seugolom jiduek ji pelajari
Awai meudali jiteuka dana
Di bapak rektor dana geu cari
Bantuan geubri kuliah beuna
Hana nibak kip laen geu cari
Baitul Mal bri duson ngon kuta
Menyoe hana inan geu beot gaki
Berkas lam mari geu tuka bawa
Nyan peunteng dana bease ji bri
Kadang bak lldikti geucuba mita
nyang aneuk ayah beuseurta ummi
Beu seunang hati kuliah beuna
Dak hana peng droe didalam laci
Kuliah jadi na beasiswa
Jamen ka hayeu jinoe hai dekti
Sikula tinggi bek ragu gata
Walau gasien that hana meugaji
Sikula tinggi jeut cita-cita
Kon lage jameun sikula tinggi
Kameng keubiri abeh meujumba
Geu publoe tanoh toko meuriti
Sikula dekti le that biaya
Tetapi jinoe ka donya aiti
Dum mahasiswi kuliah rata
Dak hana jajan geujok le ummi
Nyan bidik misi meutume bloe honda
Alhamdulillah cae ka jadi
Syukor keu Rabbi tiep-tiep kutika
Keu beasiswa uloen akhiri
Meuah beu nebri mandum peumbaca
Neuheun, 17 Februari 2022
