Oleh : Nurjannah Usman

Deungon bismillah awai lon puphon
Lon tuleh panton dalam menara
Lon ci calitra jinoe hai kawom
Hudep geulindong oleh Rabbana

Tateu’oh saba jinoe ban hukom
Le ka han muphom dum manusia
Le nyang meupake seusama kawom
Payah that meuphom malee han le na

Ladom bak jalan dawa geusambong
Kadang teusinggong moto ngon honda
Ladom lam keude dawa ija krong
Ladom bak warong ka geupeh meja

Ladom lam kanto sinan lam geudong
Ban hana untong ka mirah mata
Dalam meunasah diskusi usong
Uram ngon ujong meuputa puta

Seusama guru pih dawa ujong
Bela neulindong aneuk nyang dokha
Rata jeuet sagoe jinoe hai kawom
Gengsi meusambong tuha ngon muda

Ka lipeh saba iman ka sirong
Allah Tuhan lon neutulong hamba
Neubri beusaba ummat neulindong
Di dalam jantong meubek na ria

Saba beuluwah keu kamoe mandum
Rahmat neupeutreun o ya Rabbana
Bek bagah beungeh wate teusinggong
Bek bagah murong etika hana

Hate beuluwah sampe u jantong
Meunan tamse lon wahai syedara
Pikiran beuget bekna meukabong
Ria dengon mbong peujeu-oh sigra

Wahe ya Rabbi kamoe neulindong
Beuteudong hukum kamoe bek dawa
Silaturrahmi beuget ngon kawom
Na bacut sirong beukamoe saba

Tajak u Idi lewat ret Geudong
Nyo kue pancong mangat di Banda
Lon lakee me’ah bak mandum kawom
Desya beuampon dalam ngon lua

Neuheun, 15 Desember 2022