Oleh Nurjannah Usman
Alhamdulillah tanglong jeunulang
Lon tuleh nazam lagee biasa
Haba lon kaji jinoe keu hidang
Ampon jeunulang maulid ka teuka
Meutamah gizi dum rakan-rakan
Geupajoh hidang meusuka ria
Ureueng kheunduri hate geuseunang
Kana makanan keu ureueng papa
Kheunduri maulid wahe eu rakan
Ingat laheran nabi mulia
Masa nabi neupandang alam
Abdul Mutaleb bagikan makanan sigra
Nyan geutanyoe ummat iseulam
Beuna ingatan Rasul Ambiya
Kheunduri maulod leu that keuleubihan
Wahe eu rakan bek ragu gata
Seulaen ingat penghulee alam
Nyan keu hidangan keu ureueng papa
Hidang meulapeh macam masakan
Dalam hidangan geubuka sigra
Hate bahagia seunang kon wayang
Boh manok timphan meutume rasa
Boh itek masen na dalam rantang
Bulukat adang pih tan geulupa
Hidang meulapeh pajoh le rijang
Ladom kheun nazam berzanji sigra
Sambil seulaweut ke penghule alam
Makanan lam hidang mangat syedara
Meumacam menu wangi kon wayang
Sie teurendang keu mamah pih na
Itek teusumur pih na didepan
Mandum masakan meutumee rasa
Perbaiki gizi mangat pikiran
Geuba farakan ube-be raya
Hidang meulapeh lambong hanaban
Nyan ban jelmaan wahee syedara
Nyan meukheunduri hate geuseunang
Macam makanan ka geuseudia
Awai geusiap menu makanan
Kadang tabungan celeng geubuka
Nyan ban keuh yakin geupeu-ek hidang
Tapeusie talam suson meujumba
Watee ta kalon hate teuseunang
Puelom ta makeun makanan mulia
Badan teuh sehat mangat hanaban
Nyan dum makanan gizi meujumba
Gunoeng Geurutee leumpah that manyang
Kayee pih manyang lam huteun raya
Haba ka abeh keu bhan makanan
Meu’ah lon tuan menyoe na desya
Neuheun, 13 Oktober 2022
