Oleh : Nurjannah Usman
Assalamu’alaikum yoh phoen loen peugah
Kepada ayah bunda saweu syedara
Ulon bie salem seunang meuleumpah
Geulantoe peupah tameuah desya
Nibak wate nyoe uloen nek peugah
Soal kuliah lam kuta raja
Na yang S1 kadang peuleupah
Walau meukarat soal beulanja
Sikula beu jak walau pih sosah
Mak deungoen ayah mita beulanja
Na yang meutukang na syit tueng upah
Demi kuliah si aneuk dara
Tamat S1 hatee ka sosah
Kereuja hanapah bak mita-mita
Hana ek pike han ek so bantah
Kadang kuliah sambong S2
Nibak geutuntut ileume Allah
Keu soal sosah hana pue kira
Ladom ka macet watee kuliah
Beulanja han pah ka payah kereuja
Yang penteng saba hatee bek bobah
Soal kuliah neulanjut sigra
Taeu dikampus rata daerah
S2 bubah tiep-tiep prodi ka
Ureung duem carong le kameutamah
Rata gampong rata jeut kota
Yang penteng ileume beuna yang pesah
Walau peng kuliah kadang meutheun ka
Na nyang cok FKIP ladom kuliah
Na syiet hai ayah sideh bak MIPA
Na nyang cok hukom kadang geu peupah
Hana kureung dah tehnik geuraba
Na nyang kedokteran ileume sosah
Penelitian payah leu tubit dana
Asai yang penteng kuliah beuglah
Walau pih ayah peugala honda
Hana syiet tinggal ekonomi geu ilah
Ileume ngoen peupah keu soai harta
Gadoh meuhitung neraca geu peupah
Rumiet meulumpah bak kira-kira
Haba kahabeh ratoh ka leupah
Soal kuliah kasep tareka
Bak kali laen kadang ta olah
Haba kuliah tasambong teuma
Neuhen, 20 April 2016
