Nisfu Sya’ban
Oleh : Ummi Kamil

Assalamualaikum saleum lon puphon
Haba lon sambong dalam meunara
Jinoe lon kisah panton lon sambong
Haba lon suson Sya’ban mulia

Ta jep ie puteh mangat lam rukueng
Pajoh on rumpuen musem keunong sa
Keu Nisfu Sya’ban jinoe ta sambong
Di dalam gampong atau lam kota

Bak Nisfu Sya’ban le that peue untong
Geutanyoe kawom beuta keurija
Jeuet ta puasa sunat hai kawom
Jeuet pubuet rukon amalan agama

Tabeuet Al-Quran zikir ta sambong
Doa hai dek Ton ubena kuasa
Pubuet amalan bek lale kawom
Tasbih ta sambong beu ampon desya

Ta baca yasin Quran ta puphon
Waqi’ah langsong tiep-tiep kutika
Seureng meuratep bileung meuhimpon
Doa meulindong nibak Rabbana

Segala do’a lakee bak Rabbon
Neupeutrok langsong uleh Rabbana
Do’a nyang get-get khusyu’ lam jantong
Bek ragu kawom geukabul pinta

Meunan amalan tanyoe bek bingong
Agam ngon inong meubek ta lupa
Pubuet amalan wahe e dek nong
Ngon rukon limong beuna tajaga

Lagak ban keumang sikarang bungong
Mangat meukeunong ji kalon mata
Haba ka abeh meu’ah lon mohon
Panton le kureung kadang na ceudra

Neuheun, 17 Maret 2022