Muhammad Safdy
Haba lon peu phon deungon bismillah
Panton meukisah saleum bak punca
Keu tanda hormat umi ngon ayah
Jaroe dua blah ateuh jeumala
Bapak pemimpin nyang leupah gagah
Geu sok kupiyah bintang meubanja
Beuna neu ingat keu rakyat sosah
Dum apoh apah sideh lam desa
Ladum ceu matok ladum theun geutah
Ngon bajee beukah geujak keurija
Sabee tiep uroe geu jak tueng upah
Na nyang ceumeucah lam uteun raya
Mita raseuki kadang musibah
Bak kayee reubah lam uteun raya
Mungkin ka takdir ka nibak Allah
Meunan keuh kisah rakyat jeulata
Pemimpin nanggroe bek le meu ulah
Jaga maruwah bak peugah haba
Ta teupeu malee meunyoe na salah
Neu lakee meuah teulanjo haba
Peulom ta kalon rakyat nyang sosah
Bek le meu kilah meu tipe daya
Ta peudong hukom beuna ngon salah
Bek dudoe teulah yoh akhe masa
Yoh mantong watee geu brie le Allah
Ingat amanah pemimpin bangsa
Bakti keu nanggroe lagee kheun Allah
Yoh goh meupisah jiwa ngon raga
Ie mata seudeh bek keuh le tumpah
Bek le ro darah di Nusantara
Bek le korupsi meu bagi jatah
Taubat bak Allah beu ampon desya
Bapak Jokowi bacut lon peugah
Gata bek goyah memimpin bangsa
Indonesia negara luwah
Pikee beu bagah ngon bijaksana
Kasep di sinoe haba meukisah
Pesan amanah pemimpin bangsa
Jak ta meudo’a ka nibak Allah
Nanggroe meutuwah rakyat seujahtra
Aceh Jaya, 18 Februari 2015
