Gema JUMAT, 03 JUNI 2016
Oleh: Nurjannah Usman
 
Subhanallah loen pujoe Tuhan
Nyang bri kehidupan u dalam donya
Nyang peujet langet sereuta awan
Nyang peutron hujan di dalam donya
 
Saleum uloen bri ke rakan-rakan
Nyang na mat sajan Tabloid Gema
Nibak kali nyoe tabahas reusam
Keu uroe meugang takisah haba
 
Haba ta tuleh dalam kiasan
Untuk bacaan dalam Menara
Dua uroe teuk katrouk Makmeugang
Bloe sie hai rakan tataguen teuma
 
Ladom peu-aweh na syit peu-santan
Bek tuwoe rakan sie ruboh beuna
Meumacam-macam taguen sie reundang
Mandum masakan teuhidang kana
 
Wate neu peusoh u dalam idang
Bek tuwoe rakan keu yatim nama
Di aneuk yatim hana jimeugang
Hana sie kadang ureueng bloe hana
 
Hana le ayah ureueng ji sayang
Poma hai rakan hana beulanja
Teulubeh doa nibak watee nyan
Hate tan seunang ie mata bho bha
 
Budaya Meugang ka meunan reusam
Momentum rakan khanduri keu poma
Aweuk meugisa cawoe l am ayan
Beulangoeng rakan u dapu sigra
 
Meunan adat bak tanyoe taulan
Asai Makmeugang pajoh sie teuma
Peusenang hate yatim tasayang
Tajoek keumasan dengon beulanja
 
Raya that pahala neubri le Tuhan
Yatim tasayang tabri peu nyang na
Adak tapajoh hate ka seunang
Hana le beban di dalam dada
 
Khanduri kalheuh kana lam hidang
Keu mandum rakan yatim meubanja
Teuduek meuriti dalam baresan
Jipreh bingkisan hate lam saba
 
Meumada ohnoe haba loen karang
Soai Makmeugang bunoe calitra
Lon lake izin bak rakan-rakan
Jumat depan tasambong teuma
 
Neuheun, 2 Juni 2016