Deungon bismillah haba lon sambong
Kisah lam panton ta cuba rika
Seulaweuet keu nabi beuna tasanjong
Saleum nyan lambung dalam media
Buleun puasa jinoe ta singgong
Karap trok ujong syakban ji bungka
Padup uroe teuk lheuh meulingkeu thon
Hai panyoet tanglong Ramadhan teuka
Tapeugleh niet hatee ngon jantong
Bek mala ujong pahala puasa
Ta jaga nariet di dalam gampong
Rakan ngon karong tameu’ah beuna
Meubek meu dendam wahe eu kawom
Bek le meu ujong bak peugah haba
Nyang kana dendam nyan ka teusinggong
Hai bungong tanjong meu’ah beu sigra
Desya ta meu’ah uram ngon ujong
Awai ta puphoen ayah ngon poma
Tacom jaroe tuoet ta sanjong
Desya Geu ampon Allah Taala
‘Oh lheuh ta meu’ah mamandum kawom
Di dalam gampong jiran beu rata
Dudoe bek tuwoe haba ta sambong
Ta meu’ ah langsong dalam media
Di dalam Facebook kadang na teusinggong
Instagram langsong meu bek talupa
Leu that meu upat jinoe hai kawom
Hana le langsong lewat media
Watee ka abeh meu’ah ta rawon
Desya geu ampon oleh Allah Taala
Baroe ka tentram di dalam jantong
Puasa langsong ngon hatee suka
Tamat juz amma Quran tasambong
Ta baca langsong ngon hate suka
Haba ka abeh awai ngon ujong
Meu’ah desya lon wahe syeedara
Neuheun, 31 Maret 2021@
