Assalamualaikum awai lon puphoen
Keu saudara lon mandum pembaca
Kata nyang indah lon cuba sambong
Peu aleuk panton dalam menara
Lagak bungong pik ‘oh ujen jitron
Indah meususon kuneng wareuna
Mesra hubungan ratu ngon ampon
Sijudo langsong lam rumoh tangga
Wate geusambot nikah geu seuon
Beban meutanggong ateuh kepala
Saleng meugaseh cinta meusambong
Haleu bak Rabbon gata sikama
Cinta meurajut didalam jantong
Sesuai hukom dalam agama
Jaga saudara beusopan santon
Rumoh nyang rihoen syurga lam donya
Bek tameupake saleng meulindong
Talake ampon nibak Rabbana
Jaga martabat bungong sikumtom
Jaga adoe lon marwah kanda
Ta jaga tuboh aurat talindong
Hate ngon jantong bek gop jak cuca
Tarawat wajah cantek teusanjong
Ikhlas Neulindong keu judo gata
Rasa meugaseh sipanyang tahon
Leupi lam jantong meunan saudara
Tajaga aneuk sipanyot tanglong
Do’a bak Rabbon meubek talupa
Cicem kedidi ateuh bak rambong
Jimusu tiyong ateuh bak pala
Haba ka abeh kata ka puntong
Meuah keu ulon bak rakan dumna
Neuheun, 28 Januari 2021
