Thon Baro Masehi
Oleh : Ummi Kamil
Dengon bismillah ulon mulai
Ta pujoe Rabbi tiep-tiep kutika
Haba lon sambong keu thon Masehi
Buleuen Januari mulai teuka
Dua ribee dua ploh dua jinoe hai akhi
Kon thon islami tanyoe syedara
Walau pih hana ta peringati
Ta evaluasi peue nyang keurija
Beule ibadat ta peugot budi
Beule khanduri keu kawom papa
Beugot ta meungon dengon famili
Meu bek na iri bak meusyedara
Buet nyang ka leupah kadang na keuji
Jinoe pahami ubah beusigra
Akhlak ta peugot buet bek meutaki
Meunyo ta cari tamong syuruga
Pubuet ibadah beu le ta kawi
Beujai mengaji peu phom agama
Ta meuseudeukah ta hitong jari
Bek takurangi wahe pembaca
Ibadah tamah shalat beu meuri
Silaturrahmi beuna tabina
Saleng gemaseh meuceh hai akhi
Bek saling benci rakan seulingka
Jama’ah beu le shaf punoh rapi
Meuseujid tari duson ngon kota
Beunah aturan kanan ngon kiri
Nyang na meutaki ubah beusigra
Hukom taikot sesuai islami
Nyang larang Rabbi beuna keurija
Ibadah tamah ampon bak Rabbi
Nyang buet-buet keuji taubat nasuha
Angen kajipot badan teuh leupie
Kameng keubiri yo ujeuen teuka
Haba ka abeh ampon bak Rabbi
Meu’ah beuneu bri meubek na desya
Neuheun, 07 Januari 2022
